سجل يا زمن ...
جمال الحميدي
.
الحرف مرسى والقصيده بحر والهاجس شراع
ذي ما يجيد الغوص والتجديف يلقى مصرعه
.
ما ينطبق فيها مثال الحاجه ام الإختراع
لا تخترع مابش حجر يثمر لذا لا تزرعه
.
الشعر مش تزوير في لجنة صناديق اقتراع
هو وحي فطره دونها كأسك أسى تتجرعه
.
جمال هو البداع ما تعصف به امواج الصراع
حرفه هدى دوى صدى يا هاوي الشعر اسمعه
.
شاعر يماني حميدي عرش للبيضاء رداع
العز رمزه والوفا طبعه وثاه هي موقعه
.
ما ينحني راسه وناموسه حصونه والقلاع
والنومسه قمة جبل مش من تشنقع يطلعه
.
دون الشرف دون الكرامه يوم يا دنيا وداع
إجمع ولكن عيشة الذله رقم لا تجمعه
.
إياك تخرج من حمى جلد النماره والسباع
قع ذيب شاجع حر حبل الخوف يا ذيب اقطعه
.
هاجم على حقك وعند الحق لك حق الدفاع
لو كان مهر الحق راسك كاش للحق ادفعه
.
حدد مكانك والسما تبقى سما والقاع قاع
ومن سماه القاع سيبه صعب تقدر تقنعه
.
رقع ولا قد طاح راسك ما يداويه الرقاع
عالج بعقلك كل موقف بالدوا ذي ينفعه
.
إفهم تعلم قبل فن القول حسن الإستماع
واكسب وعلمك خير مكسب عز قدرك يرفعه
.
الوعي نوره باب مفتاحه ثقافه واطلاع
والجهل عله وش مع ذي ما تعلم وش معه
.
حارب وسالم والثقه بالنفس زادك والمتاع
معها بها لا تنتظر من يصنع النصر..اصنعه
.
الشعر حكمه مش مجرد وزن تقليد اتباع
ما هيل ذي ماشي على مبدا قدا فز اتبعه
.
صلاة ربي تبلغك يا نور عيني كل ساع
العطر ذكرك في ختام القول والا مطلعه
.
اللغز عاصي جا على حاصل وضيعهن وباع
والحل ذي ما ورث ابنه عرف هو ذي ضيعه
لله دركم مجله منتدى شعراء العرب
ردحذف