قصيدة بعنوان
(( الأنترة سم المرة))
قالت لي ام العيال ايش غيرك منا
يا بو محمد طول الليل بت أنتر
فقلت يا بنت عمي ايش قد معنا
سمعت نغمة جديدة منكم تصدر
قالت صرااااحة انت بالجوال تزعجنا
مشغول بالنت كودك للرصيد تعشر
للصبح سامر مع الجوال تسهرنا
وتنوم لا ظهر واحنا فجر بنبكر
فقلت يا غالية من زعلك منا
معي قصائد وتوثيق يا مليح اصبر
قالت صبرنا على شانك تحملنا
الى متى يا نجيب كم جهدنا نصبر
فقلت يا زين بالمفتوح كلمنا
في نفسك اشياء مخفية بها خبر
في نفسي اعرف بها لا تستحي منا
وانا اوعدك يا حبيبي احتفظ بالسر
قالت وهي مستحية شكية فينا
من بيت اراسل لمن بيت اتصل واهدر
اكيد معك واحدة عد تسرقك منا
بتراسلك وتس طول الليل لا تنكر
بيت ابصرك حين تتبسم وتشحرنا
لا جت رسالة ولا عد فالمكان بتقر
سقى اللة ايام قبل النت كيف كنا
نسمر ونضحك عادك يا نجيب تذكر
من يوم جاء النت ما عد زدت تذكرنا
ولا نسولف سواء كلا ولا نسمر
من يوم جاء النت والجوال ودفنا
با نقطع النت والجوال لة نكسر
فقلت يا روح روحي باللة اسمعنا
باكلمك بالصراحة الان غير افكر
اتعوذ ابليس ذي من. تعوذنا
واذكر اللة وصلي عالنبي وابشر
بما يسرك امانة بس ثق فينا
وابعد الشك من راسك قدك مدبر
احنا اتفقنا في الماضي وسدينا
ما نختلف في الحياة لا قد نسيت اذكر
زمان يا ام. العيال. الصدق حبينا
لامثالنا الحب بعد اليوم ما يسبر
من يوم تزوجت باب الحب قفلنا
اطمني يا قمر ما عد لبنت انظر
قد الغلا والحصار والقصف تعبنا
ما كودنا اشقى على الصابون هو والبر
والغاز والزيت والمصروف كود احنا
والبيت هو ملك عاد لو كنت مستأجر
هذة نصيحة لذي هو مرتبط منا
في غرفة النوم يا خي للمليح احزر
واسمر وسولف مع ذي لجلك اتحنا
وغلق النت لا ترسل ولا تنشر
بذات ذي مغترب فالمملكة ما احنا
احنا فالبيت ما هو لة سنين واشهر
مفارق الغيد لة عامين بيتمنى
وهو في البيت مع محبوبتة يسمر
وكل جمعة يكلمها ويتغنى
القرب يا خل جنة والفراق هو مر
وحن يسافر معاها اااسبوع يتهنى
وبعد الاسبوع يفلتها ولا يكبر
من يدها النقش ما قد سار والحنا
ما بش ملامة عليها لا بدت تحجر
ساهر. مخزن مع الاصحاب فالمبنى
والخل رااااااقد بثوب النوم بينخر
يا مغترب خاف ربك ما عليك منا
قض الاجازة مع المحبوب ستة اشهر
هي ستة اشهر قليلة عيش واتهنى
كودي بتحسب متى تخرج متى تنشر
تحياتي للجميع
الشاعر
ابومغني نجيب الحرورة
ليست هناك تعليقات:
إرسال تعليق
ادرج تعليقك في مجلة شعراء العرب