*قصيدة بعنوان(يزنط لا زنط من حقه)*
الشاعر يحيى عبيد المطري
من حقه يشل الراتب 00والموجب يخليه سالب
واصل بس يابو طالب00يهنى والهموم انساها
يزنط لا زنط هو سيد00يربط من ربط ويقيّد
يعمر فلّته ويشيّد00دامك هاشمي اتباها
ياّكل ما اشتهى ويخزن00ويزومل لنا ويدندن
والمسكين يشلوه الجن00محلا صورتك محلاها
ما يعشق فؤاده جره00ليلة قدر تاتي مرة
واصل ياابن طه الزرة00قد جت لك وماحد جاها
اجلس ماعليك اترزق00وادخل مخزنك واتبندق
واللي يتبعك يتبردق00ويسمّخ ويالله هاها
ياخذ كلما يحتاجه00لا اسمع حد يقل مزغاجه
فالبترول من انتاجه00ما يوعد بها فاها
يتزوج بمن يشتيها00عاد له حق قالو فيها
يا بالغصب او يرميها00 وانت اختار لك احداها
يقطع راتبي والمصروف00يكسر لقف من هو ملقوف
انت الهاشمي المعروف 00ماحد مثلكم سواها
يسرق كل شي!!يستعمر00ويدق البيوت ويفجّر
لا اسمع حد يقل متكبر00جده يا حبيبي طه !!!
يزنط فوقنا ويفحط00يلعب لعبته ويشطط
يفعل ما فعل ويلخبط00ما دام الجميع يتصاها
وفّر كل شي ما قصًر00 وانهى الكفر وانهى المنكر
من صنعاء لحتى لودر00شلة من ابوه يلفاها
حارب في ذمار الردّه00وانهى امريك داخل صعده
سوا كل حاجه وحده00واحزاب الوطن صفاها
حالف حزب صالح عفاش00ذي اعطاه حتى الرشاش
لكن الجمالي ما عاش00ضربة واحده ما اثناها
وحزب المؤتمر ذي كانوا00جنب الحوثيه قد مالوا
لكن بعضهم لا زالوا 00كاالفيران في مسعاها
حارب بالشعار العدوان00فجّر كل دور القران
واللي ماقد اهتان اهتان00من سطى أبوه ينهاها
طر امريك ذي في باجل00واسرائيل ذي في يازل
حرر شعبنا بالكامل00يمناها مع يسراها
واتسلح سلاح الدولة00والمتبردقين من حوله
وانتم يا عبيد ادعوا له00وافتح ملزمة واقروها
واصل ياابن طه واصل00واصرف كل ليله زامل
واللي مااقتنع بالحاصل00بلوها ويشرب ماها
ما دام النبي هو جدك00سوي في البلد ما ودّك
حقك يا عبادي حقك00واللي أيّدك ما اخطاها
انت العالم الرباني 00وانت القائد الميداني
يا دانه لدانه داااااني 00وافهم ياغبي مغزاها
عادي سهل لا ما صليت00ولّا للحدود اتعديت
ما دامك تحب ال البيت00صرتوا في الجنان اعلاها
وسّع للمقابر وسّع00واسمع شيخك المتقبع
ولا اشتطت عليكم رقع00حماها دقون حماها
صبرك يا مواطن صبرك 00وافتح للبلاوي صدرك
كيف تشكي وجع من ظهرك!!00من جاب العلل داواها
قد قلنا لكم هي لعبه 00 ما جاء لاجل سعر الدبه
قمتوا جانبه في الهبه00ماحد شي فهم عقباها
قد قلنا لكم هو مدبر 00جا من وسط صعده مغبر
قلتوا با يرخص للبر00والبترول ذي غلاها
ذلحين المعاشات مابش 00والمسكين جاوع عاطش
والقنديل دااافي فارش00ولعها وما طفاها
وبعدين عسكروك اجباري 00وابنك سار وما انتا داري
قلك عاد معانا الباري!! 00شلوها عقول ما اغباها
يجمع لي شويه جهال 00واغلبهم مصاريع اقفال
واملا جبهته بالاطفال00والسيد لها عباها
محنه يا مدابير محنه00لا راحه ولا به جنة
يشتوا حرب شيعه سنه00ماعد با نجس نتكاها
صلينا على بو الزهرا00في سراءنا والضراء
صلوا يا جماعه تترا00من جا للنفوس اهداها
===......
*الشاعر يحيى عبيد المطري*
ليست هناك تعليقات:
إرسال تعليق
ادرج تعليقك في مجلة شعراء العرب