##يادنيتي بس يكفي###
علي اسماعيل الكميم
يادنيتي بس يكفي...
يكفي الذي منك لاقيت..
يادنيتي بس كٌُفي..
كم من جروحك تلقيت...
قدخار جنبي وكفي..
من كثر ما الهم شليت..
مكفي من الهم مكفي..
كفيت ياوقت وفيت..
******
ليت القدر شل قلبي..
ياليتني ماعد امسيت..
ياليت والله وربي...
قبل الماسي توفيت..
ولا فراقي لحبي..
ويضيع ماقد تمنيت..
بفرقته زاد غلبي..
كم صحت بعده وونيت
********
مافادني قول غبني..
ولا البكاء ذي له ابكيت..
ولا قصيدي ولحني..
ولا الغناء ذي تغنيت...
من بعد سيدي وعيني..
ماذقت راحه وشميت..
********
شبكي عليك طول عمري...
يا من لك احببت ووفيت..
ووفيك الئ يوم قبري...
وانحت حروفك علئ البيت...
وانسج حروفي وشعري..
ارثي فراقك مائه بيت...
ويظل حبك بصدري...
ان غبت عني ووليت..
********
يا من نهب قلب احتل..
واحرقت روحي وشديت...
انت الاخير وانت الاول...
عنك حرام ما تخليت..
ولا حبيبك تخيل...
غيرك حبيب او نطق ليت..
في زفتك موتي اقبل..
قلبي طفي يوم زفيت...
*******
لن المحبه لبشرئ..
قلت الصراحه ولا اخفيت..
انا احبك لك اهوئ...
واعطيت قلبي لك اهديت..
درستكم من الف باء...
عشقتكم ما تسليت...
بس القدر كان الاقوئ..
وخاب ما كنت ظنيت....
*********
جالك نصيبك وشلك..
يا عيبتك كيف دليت...
حبك ونساك خلك..
خطب وخلاك تكسيت..
نسيتني اح ويلك..
وانا حرام ماتناسيت..
في صبح يومك وليلك..
غطيت جسمك ودفيت..
********
صقر الصقور شل طيري..
وجبه خفيفه علئ الزيت..
قهري عليك الف قهري..
شبعوا وانا ما تعشيت..
اصبحت في حضن غيري..
وانا بزيتك وربيت..
قد كنت عايش باسري...
لاكن اسف انت فريت..
********
ياناس بالله اعذروني..
لو في الشوارع تلويت..
حجرت لاتنقدوني..
لو راح عقلي وجنيت..
وان انتهيت سامحوني..
او غبت عنكم وقفيت..
تشتوا الدواء زوجوني..
باللي عشقته وحبيت..
****
كلمات/
علي اسماعيل الكميم
٢٠/٦/٢٠١٩
ليست هناك تعليقات:
إرسال تعليق
ادرج تعليقك في مجلة شعراء العرب