##مشو عيب لادليت## بقلم الشاعر علي اسماعيل الكميم

##مشو عيب لادليت##
بقلم الشاعر علي اسماعيل الكميم

وربي مانتسي حبك..
واقسم لك برب البيت..

وبفضل للاخير جنبك..
وعهدي للاله اديت..

وببقاء في وسط قلبك..
اصون القلب ذي حبيت.

ولا لي حب من عقبك..
مدامك في الفواد حليت..

بضل امشي على دربك..
وامرك لاوصل لبيت..

وطاير في يمين سربك..
مرافق حيث ماشديت..

معك في شرقك وغربك..
بقلبك اينما حليت..

بكون القطن في بردك..
اذا جسمك برد دفيت..

وماءك لاعطش وردك..
اذا وردك عطش سقيت..

وخاتم في وسط يدك..
بامرك مشتهيت اديت..

وجندي في اللواء عندك..
وحارس عند باب البيت..

باكون في الحب مخلص لك..
لاني لاوفيت اوفيت..

لاني في الوفاء مثلك..
ولافي حبي اتسليت..

احب بصدق وخلص لك..
ولاعن مخلص اتخليت..

فهذا القلب شله لك..
واوبه له اذا شليت..

فداك الروح ومانملك..
وليتك ماترده ليت..

فهذا القلب مدلول لك..
ومشو عيب لادليت..

فشرخص كل مملك لك..
هديه لاترد مااهديت..

وشنذر كل عمري لك..
مقابل شخص له حبيت..

انا لك لاكثر همك..
ازيح الهم لاهميت..

سلا قلبك جلا غمك..
ومنديل الدموع لابكيت..

فقوي ياحبيب عزمك..
فخذني حي ولا ميت..

وسمعني جواب فمك..
وصيغ الرد كيف ماشتيت

كلمات /
علي اسماعيل الكميم
19/6/2019