بنت الاجواد… !!
__________________ة
الشاعر/صالح الخلقي:
بنت الاجواد باعوها بلاش
البلاش
واجبروها مع شيبه مخرّف تعيش
لنتحر قلبها المكلوم والعقل طاش
فالغريم اهلها ذي قفلوها بشِيْش
نتّفوا ريش فرحتها طمع في المعاش
ليت والله وهم بقوا لها خمس ريش
ان قلنا قُرَاش عنهم ظلمنا القراش
لانها ما بتتعاطى اضر الحشيش
الشاعر/عبدالله الحبيشي:
يا مناقش قضيه تستحق النقاش
واخرتها وخيمه لوتضلي نديش
لبسوها قماش في العرس غيرالقماش
ناس ما تعرف العونه عصيد او هريش
الذي زوجوش يابنت من دون رضاش
سووا العيب بعد العيب فينا وفيش
ان دفعوا لهذا الزاحف المهر كاش
نفسخ العقد والا هي عتهدا ربيش
الشاعر/ علي الراعي :
اخرجوها من الغشاش سود القعاش
ما امست الا مع رجال باشا وبيش
وانتعش قلبها به قمة الانتعاش
بعدما كانت الموجه معاها وشيش
زغردي يا بنادق واحجري يا طماش
وارعشي جذع فرحهتا رعيش الرعيش
الأمير والأميره في الدفاء والفراش
والحسد في شرايين الشواني يجيش
بين عفّاش والنوّاش ليله ولاش
ذي قري يعلم أيش فيها وذي ما قريش
الشاعر/صالح الخلقي :
لو تركب لعينك يا مصوّر فلاش
ما تصوّر صور سوداء وتجهش جهيش
ارتكبتوا جريمه حابسه للطشاش
في قمر نورها اجلى كل ليلٍ غطيش
لا بلح فوق نخلتكم ولا في الخياش
اصبح الوعد عرقوبي وعظمه هشيش
من براش للعشاش للمنشيه لا حُفاش
ما عد إلا يد الفوضى نراها تطيش
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara
ليست هناك تعليقات:
إرسال تعليق
ادرج تعليقك في مجلة شعراء العرب