أكرم:عاد أنا عاد أكسرها لش، صدقتي نفسش، أنتِ مره...مره
عارفه أيش معنى مره
سوسن:يا أمااااه
تعالي لولدش المجنون
الأم:مالكم يا عيالي
صلوا على النبي
أترك أختك يا أكرم
أكرم:أمه الله يحفظكم، خليني أربيها تقع مره، هذيه قليلة ادب
سوسن:والله ما قليل أدب إلا أنت، ولا انا مره، أو ناقصة
أكرم:أيوة
ناقصة دين وميراث
الأم:أكرم، خل أختك تخرج قد صاحبتها في الباب بالسيارة
وبعدين أحنا نتجابر، الله يحفظك يا أبني
أكرم:علشانش يا أمه، أنقلعي قلعوا عينش.
*أما في بيت فؤاد*
فؤاد:أتفضلي يا شيماء بيتك، وحشتيني مووت
شيماء:وأنت يا روحي وحشتني اكثر، ليش أتأخرت عليا، حتى تلفونك مغلقه.
فؤاد: هاه
ما بلى كانت زحمة سيارات، وتلفوني أنسرق
شيماء:لا تجنني
متى هذا؟
فؤاد:الليلة بعد العشاء
رحت البقالة اشتري لي بارد، وكانت زحمة، مادريت من الي خطفه من جيبي.
شيماء:وصورنا
كييييف؟
فؤاد:أطمئني
أنا قد كنت شلت الذاكرة من التلفون.
شيماء:الحمدلله
اووووه غبني عليه
نت 7
بمبلغ
فؤاد:كل شي يفدا راسك، سهل بكره اروح اشتري لي ثاني.
سمير: فؤاد، يا فؤاد
فؤاد:ايوه يا سمير
سمير:مالك يا أخي ما انتشي على بعضك
فؤاد:تعال يا سمير
اشتي اكلمك
سمير:خير يا أخي
فؤاد:أنت عارف أني تعرضت لقطاع الطرق
سمير:أنا ابو الولد
قول بغيرها يا رجال
فؤاد:أي والله
وأخذوا مني كل ما في جيبي من فلوس، والمسدس، والتلفون، المهم. ربك ستر عليا
سمير:الله لا وفقهم
فين بالضبط؟
فؤاد:في السايلة
سمير:كم حذرتك من المشي من السايلة في الليل، لكن أنت ما تسمع لأحد.
فؤاد:ايش اعمل يا أخي، طريق مُختصره لا بيت عمي.
سمير:وكم منهم؟
فؤاد:خمسة ملثمين
سمير:غضب الله عليهم، وعادك بعض الأوقات تحمل فوق سيارتك فلوس الناس ملايين، هيا انتبه على نفسك.
فؤاد:صدقت يا أخي، المفروض مثلنا يا الصرافين يكون معنا أقل شي، مرافق أ. أثنين مسلحين.
سمير:ما ذلحين ضروري، مش مفروض، والليلة عاد اشوفهم.
فؤاد:تمام
سمير: حمدالله على سلامتك، ذي خلصك الله من بين ايداتهم
هولا مجرمين لا يخافوا الله ولا رسوله
فؤاد:الله يسلمك يا أخي ..قدر ولطف
شلوا لهم مليون
الفلوس. والمسدس والجوال، كلهن يفدين راسي، وينتبه الواحد من القادم.
*وفي اليوم التالي، في بيت سامي، كان أحد أخوة سماح عنده حالة نفسية*
بندر:وأنا يالي كنت طبيب الهوى...ولأهل العشق باجيب الدوا....من نظرة لقتني صريع الهوى، ياااا...يا ابوووي...ياااا..ابوووي
سماح:قوم من قُبالي خيرة الله على مشك، لا عاد تطلع لي شي روحي.
بندر:يا طبيبي أنا أمسيت أدور حبيبي، والفؤاد في ضنى ولا تحقق نصيبي، آه...آه...آه...يا نجوم السما بالله ردي وجيبي.
سماح:أماااااه
جي لولدش، ضبح بي
بندر:وليييييش
ضبحت بشششششش
أنا فرحااااان لشششششش
عيقع عندنا عرس...ونقرح..بببببببم...ببببببم.
الأم:أيوة يا بندر
عيقع عرس حناني طناني، ونزف اختك للشيخ منصور، من مالاً وروح.
بندر:أمه..أمه
هووووو
هووو عيكون يجيب لي فلوووس، ويمشيني فووووق سيارته؟
الأم:اكيييد يا قلبي
فهو صهيركم، وبعدين باين عليه طيب قوووي
سماح:شلوووكم الجن انتوا وياه
الأم:يووه بسم الله علينا، والله لو قد تعرفيه وتعاشريه، لا تقولي ليت زماني تقدم، طيوووب.
سماح:أهم شي يدعمكم بالفلوس، وأنا أعيش وإلا في ستيييين داهية...صح
بندر:أمه...مالها هذه. بتتكلم على زوجها هكذا، هذا ح..ح...ح.بي.بي.بي.بيش
ههههههههه
ههههههه
ههههههه
سماح بصوت عالي:أسسسسسسكت..لك سكته قلبية، ناقصة جنانك أنا ...صح
بندر:وليه بتصيحي ذلحين ...خوف..خوف..خوووفتيني...أماااه..قولي لها لا تصيحش.
الأم:خوفتي لي الولد
مالش بتقعي هكذا؟
اول من اتزوجت أو أيش؟
اسكتي، عيرجع ابوش يقلب صورته عليش
سماح:اقلبوا صوركم عاااادي؛ أصلاً أنا ميته...ميته..سواءً زفيتوني..أو قبرتوني
ما تفرق معي ابداً
الأم:هيا أمسكي هولا تمر وحليب وزبيب، وجعاله، جابهن زوجش
سماح:ما اشتيييش
شليهن لش، ايش اعمل بهن.
الأم:غذي نفسش
أنت عروسة
سماح:عروووسة
بالله عليش
أنا عروووسة
الأب داخلاً من الخارج:أيوه عروسة وست العرايس كمان.
سماح:الله لا وفقكم ...كيف انتوا ظلمة
الأب غاضباً:ماهو ماهو؟
لا وفقنا...والله أن قد لسانش طول قوووي
قدو أطول منش...صح
سماح:حرااام عليكم
حكمتوا عليا بالقتل وأنا حية، وعقدتوا من دون رضاي على رجال في سنك يا أبه، أيش هذه الأبوه ذي تحملها، والله ما عاد في قلبك ذرة رحمة.
الأب بصوت عالي:هااااه
أحلفي...أنا سااكت لش
وكل يوم أقول اجلها، علشان أمها...وأنتي تزيدي بهن قوووي
ضروري تقع لش قرصة
علشان تصحي من نومش.
بندر:هههههههه
قرصة، عت عت عت عتقرصها يا أبااااه
الأب:روح يا بندر جيب لي اليسره حقك، اقرصها بها.
بندر:لا...اليسره لا
حرااام والله
الأب بغضب:خلاص
أنا أجيبها
الأم:إنا تعوذب من الشيطان يا رجال
هي حريوة
ما يسبرش تضربها
الأب:ضروري تتأدب
وتدري أن لها حدود
أبعدي من قُبالي...أبعددددي.
*وهنا تنتهي الحلقة الخامسة*
*ك/منى الزيادي*
ليست هناك تعليقات:
إرسال تعليق
ادرج تعليقك في مجلة شعراء العرب