معايا حل قلم الشاعر علي اسماعيل الكميــم

**معايا حل**

تقول المشكله اني اودك..
وضنك انني فالحب مشتيك..

حرام بالله اني موت احبك..
ولوتطلب عيوني صدق لعطيك..

معايا حل غير الحل حقك..
معايا حل يرضيني ويرضيك..

تشل القلب وانا شل قلبك..
وتهديني هديه مثل ماهديك..

تجي عندي وانا باسير عندك..
وتسقيني وانامن حبي اسقيك..

تبادلني الوفاء ويذوب خوفك..
وابشر ياحبيب القلب نوفيك..

اكون خاتم ذهب في وسط يدك..
وتبقى خاتمي البسك واحميك..

تلبي مطلبي لو كان عندك..
وانفذ مطلبك واقول لبيك..

تكون طايع وماتخلف لوعدك..
وانا لاحتجتني شبيك لبيك..

تكون العين وانا اكون عينك..
وجفنك لانعست عينك اغطيك..

تريد الموت انا باموت بعدك..
تريد العيش لك بالروح بفديك..

اعيش العمر في حبك وودك..
وعمري بصرفه لك كاش او شيك..

فسمعني جواب من وسط فمك..
اظن الحل يرضيني ويرضيك..

كلمات/العميد
علي اسماعيل الكميم
١٩/٧/٢٠١٩