. _*الشعر حكمه*_
الشعر حكمه والكلام العذب دستور الوفا
والعز والتقدير والمعروف متعه للشراف
والجود ساحه واسعه لاهل النقا واهل الصفا
والطيب والإحسان مرتع للقلوب ذي هي نظاف
واهل الجمايل كل جُمله منهم تصدر شفا
تعالج الموجوع من جُرح الزمان لـ الجُرح عاف
والجيد عند الجيد مايشعر بألام الجفا
يبقى السند للظهر والمركا ومعيار المشاف
الصاحب الوافي لقلبي فُرش وانفاسي دفا
والنور في سود الليالي والمصابيح والكشاف
اللي بدرب العز يمشي مادخل درب الهفا
واللي بيعشق كل شينه ضاع في آخر مطاف
والنذل ذي دايم بيتكلم خفيه بالقفا
لاتصحبه كلا ولا تبقى الى اعماله مُضاف
الجيد ذي يثبت معك. عنك ولا لحظه غفا
والفسل يتحجى ويهرب لانظر طعن الرهاف
واذا لقا فرصه يبيعك لاجل يلفا مالفا
باعك في اسواق النخاسه بيع سارق او حراف
احذر من الصاحب يخونك عند سرك والخفا
واحذر من الإنسان ذي ماعاد من ربه يخاف
الأصل يبقى أصل والتقليد ماله مصرفا
والفرق واضح بين الاجدار المقضض، والرقاف
هذا وانا جيت اضرب الأمثال حسب المعرفا
(كما يُقال الشعر حكمه بادروا بالإعتراف)
~حُميدالشاعر~
~2020/1/16م~
🖊🖊🖊🖊🖊🖊🖊🖊🖊🖊
ليست هناك تعليقات:
إرسال تعليق
ادرج تعليقك في مجلة شعراء العرب