، الناس اجناس
لكل شاعر ينظم الشعر هوجاس
وانا مولع بالحروف الجزيلة
اشَيّد ابيات القصيدة على ساس
وابني مداميك الإخا والفضيلة
الدهر شربني شهامة ونوماس
علمني اصبر والليالي محيلة
من يشتكي من جور الأيام للناس
نفسه من الشكوى مهانة ذليلة
مادام ربي يذهب الحزن والباس
ماللبشر في طاري الهم حيلة
والناس يابو فاضل اشكال واجناس
والوقت يكشف معدنك والفصيلة
انسان في الدنيا تحطه على الراس
يبقى جوارك في الدروب الطويلة
غالي وله معدن من التبر والماس
ون جار حملك في زمانك يشيله
وانسان ماهو مثل الأجواد نبراس
ولا صفات المرجله تنتمي له
مايعرف النخوة ولا عنده احساس
وطول عمره مايسوي جميله
وانسان يذبح مثلما ذبح الأمواس
يقتل ويمشي في جنازة قتيله
والمال ماهو للرجاجيل مقياس
والكبر من طبع النفوس العليلة
واللي تشوفه نذل وسواس خناس
لا تطلبه فزعه ولا تشتكي له
عبدالرزاق الكميم
-------------------
2019/7/5م
ليست هناك تعليقات:
إرسال تعليق
ادرج تعليقك في مجلة شعراء العرب