»»»» غلطه باألف غلطه ««««
قالها أبوضماء مايحبط الحق محبط
واحبط الله باطلهم مئة ألف حبطه
حصحص الحق لا تلعب ولاعد تخطط
قد كشفنا بليلة بارحه كل خطه
خابر اهل المصالح والخبير المغالط
كل غلطه جزاها مثلها الف غلطه
والذي بين خلق الله واصل يفخطط
بايحاسب ويتعاقب على كل فخطه
مااحدا مااحدا بااولاد عمه يفرط
غير ذي مامعه بالعز والجود لقطه
كثرت اوجاعنا واحنا نعصب ونربط
اوعسى الكسر يتجبر بعصبه وربطه
لاكن الناس بين الناس تمسي تشخطط
والطلاميس فعاله بزايد وشرطه
المقايس يقايس و المخيط يخيط
لا ألحقم خير ويش التكلفه والمحطه
كل ماقلت باتطفى الحرايق وتهبط
زيدوها حطب والنار تولع بشخطه
والكبد مثل قدر الزوم يغلي وينخط
والغلايب تسبب عند الاحرار جلطه
ويله الويل من فكر بفعله يورط
يوم تبلا السراير و الامور المغطه
من عجن من طحين الجن لازم يسبط
والذهب بايصبح سود في كل شنطه
افعل الخير بالرزق الـحلال يامحنط
بايجي يوم لا تنفع مدافن وحنطه
كم وكم ناس في درب البواطل مبلط
شافت الحـق عينه لاكن ابليس غطه
مثل كلب الشوارع لا جوع قام يخبط
مايخلي بوسط السوق مسلخ وبسطه
وأخر الليل لا جات الطواهش يعيط
يزعج الناس من كذبه وهرجه وخرطه
وانت ياذي على حق المساكين تبصط
ما معايا على المسكين قوه وسلطه
من تعلا وغاض الناس لا بد يسقط
كان من كان بايدي له الله سقطه
حق الاحرار مايذهب سدى ياملخبط
كم وكم ناس شل الكبر قبلك وحطه
كل ظالم على ظالم ألاهي يسلط
لو فعلتوا لحرف الميم عشرين نقطه
هكذا الحال والدنياء طمعها ينشط
مابها خير الا من قد الباري اعطه
وانت ياصاحبي هاجم معانا ووسط
لاتقول أس لاجاك المطر وانته وسطه
ساير الناس ذي ترقع قفا من يشطط
لا تسايرش ذي لا حصل الشط شطه
بعضهم لاقدوه مريش يهنجم ويزنط
مثلما عارضات ازياء فلينه وفوطه
ساعة الصدق لا قد واجهة يعمل اخرط
بايبيعك بحال السوق ويشل ربطه
صحبة المصلحي تظهر متى انا مزلط
وان مابش معايا يوقعوني بورطه
كل واحد على رأيه يحمل و يشرط
يحسب انوه مديرالامن في قسم شرطه
والخليجي يلقاء للأوامـر ويضبط.
ويش ما تطلب امريكا يجيبه بنخطه
يلعبوا لعبة الفيران لاجانب القط
والرجاجيل ياعيباه تبتاع عرطه
ويش خلا جناح الصقر يخلس ويبرط
والدجاج مريشه والديك حاضن لبطه
ليش قدك يانضر عيني من الجوع مسبط
وانت ماكل من الدوله حلاوى وقشطه
والقسم ما اتركك جاوع وغيرك ذي يعلط
لو قطعت اللحوم واجعل من الدم شطه
عهد ما بيننا ما انا لعهدي مفرط
عاد انا بو ضماء رجال قارح وشحطه
الشاعر //
ابو ضماء محمد علي قعشه
ليست هناك تعليقات:
إرسال تعليق
ادرج تعليقك في مجلة شعراء العرب